વિડીયો વાયરલ થયો: ચોરની સમગ્ર ગતિવિધી કેદ થઇ: પોલીસ તપાસનો ધમધમાટ
રાજકોટ: અમુક ગુનેગારો એવા હોય છે જે ગુનો આચરતા પહેલા ભગવાનની માફી માંગતા હોય છે અથવા તો પુજા કે ઇબાદત કરતાં હોય છે. એક આવી જ ઘટના રાજકોટ શહેરમાં બની છે. જેમાં શહેરના ભાવનગર રોડ પર પટેલ વાડી સામે સોળ થંભી નજીક આવેલા આવેલા દાઉદી વ્હોરા સમાજના કબ્રસ્તાનના મજારના રૂમમાં ચોરીનો બનાવ બન્યો છે. અહિ ચોર ધીમેથી મજારવાળા રૂમમાં ત્રીકમ સાથે ઘુસી બાદમાં મજાર સામે બે હાથ ઉંચા કરી જાણે ચોરી કરી ઇબાદત કરતો, માફી માંગતો જોવા મળે છે. બાદમાં આ રૂમમાં જ આવેલી દાનપેટીને ત્રીકમથી તોડી ચોરી કરી ભાગી જાય છે. આ ચોરની સમગ્ર ગતિવિધી-ઘટના સીસીટીવી કેમેરામાં કેદ થઇ છે અને ઘટના વાયરલ થઇ છે. આ અંગે બી-ડિવીઝન પોલીસને કબ્રસ્તાનની દેખરેખ રાખતાં સમાજના આગેવાનોએ જાણ કરતાં તપાસ શરૂ થઇ છે. અગાઉ પણ આ પ્રકારની ચોરીઓ થઇ છે. જેમાં મંદિરોમાં ઘુસી ચોરી કરતાં પહેલા ચોર પગે લાગતો દેખાયો હતો. થોડા સમય પહેલા ભગવતીપરા ઓવર બ્રીજ નજીક મંદિરમાં ઘુસેલા ચોરે પણ પહેલા દર્શન કર્યા હતાં અને પછી ચોરી કરી હતી તેવો વિડીયો વાયરલ થયો હતો. આ વખતે કબ્રસ્તાનમાં ચોરે કળા કરી છે.
