ચાર આતંકી ઠાર, એક કેપ્ટન શહીદ;રક્ષા મંત્રીએ NSA- આર્મી ચીફ સાથે બેઠક કરી
જમ્મુ, તા. 14
જમ્મુ-કાશ્મીરના ડોડા જિલ્લામાં આતંકીઓ અને સુરક્ષાદળો વચ્ચે અથડામણ ચાલી રહી છે. દરમિયાન, ભારતીય સેનાએ પુષ્ટિ કરી છે કે એન્કાઉન્ટર દરમિયાન સેનાનો એક અધિકારી શહીદ થયો છે. સંરક્ષણ અધિકારીએ જણાવ્યું કે ભારતીય સેનાની 48 નેશનલ રાઈફલ્સનો એક કેપ્ટન શહીદ થયો છે. જણાવી દઈએ કે ડોડા વિસ્તારમાં હજુ પણ સેનાનું ઓપરેશન ચાલુ છે.
આ પહેલા માહિતી સામે આવી હતી કે આ વિસ્તારમાં એક આતંકી ઘાયલ થયો છે, જે પછી સેનાએ એન્ટી-ટેરર ઓપરેશન ચલાવ્યું હતું. આ દરમિયાન એમ-4 રાઈફલ અને ત્રણ બેગ મળી આવી હતી.
ગયા મહિને ડોડા જિલ્લામાં સેના અને આતંકવાદીઓ વચ્ચે અથડામણ થઈ હતી. આતંકવાદીઓ સાથેની અથડામણમાં ગંભીર રીતે ઘાયલ થયેલા એક અધિકારી સહિત પાંચ જવાનોનું સારવાર દરમિયાન હોસ્પિટલમાં મોત નીપજ્યું હતું. આ એન્કાઉન્ટર ત્યારે થઈ જ્યારે રાષ્ટ્રીય રાઈફલ્સ અને જમ્મુ અને કાશ્મીર પોલીસના સ્પેશિયલ ઓપરેશન ગ્રુપ (SOG) ટુકડીઓએ ડોડા શહેરથી લગભગ 55 કિમી દૂર દેસા જંગલ વિસ્તારમાં ધારી ગોટે ઉરારબાગીમાં સંયુક્ત સર્ચ ઓપરેશન શરૂ કર્યું.
થોડીવારના ગોળીબાર બાદ આતંકીઓએ ભાગવાનો પ્રયાસ કર્યો હતો. એક અધિકારીની આગેવાની હેઠળના બહાદુર સૈનિકોએ પડકારરૂપ પ્રદેશમાં ગાઢ જંગલોમાંથી તેમનો પીછો કર્યો, જેના પછી રાત્રે 9 વાગ્યાની આસપાસ જંગલમાં બીજું એન્કાઉન્ટર થયું હતું. અધિકારીઓએ જણાવ્યું કે આ અથડામણમાં પાંચ જવાન ગંભીર રીતે ઘાયલ થયા બાદ હોસ્પિટલમાં સારવાર દરમિયાન મોત થયું હતું.
ડોડાના ગઢી ભગવા વિસ્તારમાં 9 જુલાઈની સાંજે શરૂ થયેલા એન્કાઉન્ટરમાં સેના અને આતંકીઓ તરફથી સતત ગોળીબાર થઈ રહ્યો હતો. આ વિસ્તારમાં 2-3 આતંકીઓ હોવાની આશંકા હતી. જો કે, તે ભાગવામાં સફળ રહ્યા હતા. 8 જુલાઈએ જમ્મુ અને કાશ્મીરના કઠુઆ જિલ્લામાં આતંકવાદીઓએ સેનાની બે ટ્રકો પર હુમલો કર્યો હતો, જેમાં એક જુનિયર કમિશન્ડ ઓફિસર (JCO) સહિત 5 જવાનો શહીદ થયા હતા. 6 જુલાઈના રોજ સુરક્ષા દળોએ કુલગામ જિલ્લામાં બે અલગ-અલગ એન્કાઉન્ટરમાં છ આતંકવાદીઓને ઠાર કર્યા હતા. આ દરમિયાન બે જવાનો શહીદ થયા હતા.
