ગુજરાત યુનિવર્સિટીમાં મળેલા ગાંજાના છોડનો પોલીસ અને FSLની હાજરીમાં કરાયો નિકાલ

0
2003

ગુજરાત યુનિવર્સિટીમાં ગાંજાના છોડ મળી આવ્યા બાદ યુનિવર્સિટી તંત્ર હરકતમાં આવી ગયું છે. તપાસ માટે કમિટીની રચના કરવામાં આવી છે. ગાંજાના છોડ મળી આવવાની ઘટનાને કુલપતિ ડૉ.નીરજા ગુપ્તાએ ખૂબ ગંભીર ગણાવીને તપાસના આદેશ આપ્યા છે. ડૉ.નીરજા ગુપ્તાએ કહ્યું કે- છોડ ગાંજાના છે કે કેમ તેની તપાસ માટે FSLમાં તેના સેમ્પલ મોકલી આપવામાં આવ્યા છે અને આ બાબતે પોલીસ તપાસ કરી રહી છે.

તેમણે કહ્યું કે- હોસ્ટેલમાં મેઈન્ટેનન્સ કરવામાં આવશે અને જ્યાં બિનજરૂરી ઘાસ હશે તે દૂર કરવામાં આવશે. તેમણે કહ્યું કે- હોસ્ટેલમાંથી વિદેશી દારૂની બોટલ મળી હોય તેવું ધ્યાનમાં આવ્યું નથી.

બીજીતરફ ABVP અને NSUIએ ગુજરાત યુનિવર્સિટીમાં વિરોધ વ્યક્ત કર્યો. કુલપતિની ઓફિસ બહાર નાટક પ્રસ્તુત કરીને વિરોધ કરવામાં આવ્યો. સાથે જ આ મામલે કડક કાર્યવાહીની માગણી કરી. જો યોગ્ય પગલાં નહીં લેવાય તો ઉગ્ર આંદોલનની ચીમકી પણ ઉચ્ચારી.

મહત્વનું છે કે ગુજરાત યુનિવર્સિટીમાં મળેલા ગાંજાના છોડ ઉખેડી નખાયા છે. ભારે વિવાદ થયા બાદ ગાંજાનો છોડ ઉખેડી નખાયા છે. પોલીસ અને FSLની હાજરીમાં છોડ કાઢી દેવાયા હતા. ગુજરાત યુનિવર્સિટીની બોયઝ હોસ્ટેલના કંપાઉન્ડમાં ગઈકાલે ગાંજાના બે છોડ મળી આવ્યા હતા. ગુજરાત યુનિવર્સિટી હોસ્ટેલના કેમ્પસમાં D બ્લોકની બાજુમાં બે અલગ અલગ છોડ મળી આવ્યા હતા. જેમાં એક 6.5 ફૂટનો છોડ છે જ્યારે અન્ય એક 5.5 ફૂટનો છોડ છે. પોલીસના જણાવ્યા અનુસાર હોસ્ટેલ વોર્ડને પોલીસ સ્ટેશનમાં શંકાસ્પદ છોડ અંગે જાણ કરી. જે બાદ પોલીસે તપાસ કરતા શંકાસ્પદ છોડ મળી આવ્યા છે.