કાર ડેકોરની દુકાનમાં નોકરી કરતાં પર પૂર્વ સાસરિયાઓએ દુકાનમાં ઘૂસી ધમાલ કરી

0
408

શહેરના નાનામવા વિસ્તારમાં રહેતો યુવક સોમવારે સવારે ગોંડલ રોડ પર દુકાનમાં નોકરી પર હતો ત્યારે તેના પૂર્વ સાસરિયાઓએ દુકાનમાં ઘૂસી ધમાલ કરી યુવકને મારકૂટ કરતા મામલો પોલીસ સુધી પહોંચ્યો હતો.
નાનામવાના તિરુપતિપાર્કમાં રહેતા અને ગોંડલ રોડ પર કાર ડેકોરની દુકાનમાં નોકરી કરતાં દર્શન પ્રવીણભાઇ આંબલિયા (ઉ.વ.૨૩)એ ભક્તિનગર પોલીસ સ્ટેશનમાં નોંધાવેલી ફરિયાદમાં આરોપી તરીકે રમેશ ડાયા ડાંગરિયા, યોગેશ ડાંગરિયા, મહેશ ડાંગરિયા તથાં અજાણ્યા શખ્સોના નામ આપ્યા હતા.
દર્શને પોલીસ સમક્ષ જણાવ્યું હતું કે, તેની પાડોશમાં રહેતી વિધિ ડાંગરિયા સાથે તેને પ્રેમસંબંધ હોય યુવતીના પરિવારજનોના વિરોધ વચ્ચે વર્ષ ૨૦૨૨માં ભાગીને કોર્ટ મેરેજ કરી લીધા હતા. લગ્ન બાદ યુવતીના પરિવારજનો દ્વારા દબાણ શરૂ કરવામાં આવ્યું હતું અને વિધિવત રીતે લગ્ન કરાવી દેશે તેવા વચનો આપી પરત બોલાવી લેવાયા હતા. જોકે ત્યારબાદ છૂટાછેડા થઇ જાય પછી વિધિવત રીતે લગ્ન કરાવી દેશે તેવું જણાવી છૂટાછેડા કરાવી દીધા હતા.
શુક્રવારે યુવતી અને દર્શન બંને મોબાઇલમાં વાતચીત કરતા હતા ત્યારે બંને વચ્ચે બોલાચાલી થતાં ઉશ્કેરાયેલા દર્શને યુવતીના પિતાની કારનો કાચ ફોડી નાખ્યો હતો અને આ મામલે દર્શન સામે કારમાં નુકસાન કરવા અને યુવતીને પરેશાન કરતો હોવા અંગેની ફરિયાદ નોંધાવવામાં આવી હતી.
દરમિયાન સોમવારે સવારે દર્શન કાર ડેકોરની નોકરી પર હતો ત્યારે ઉપરોક્ત શખ્સો દુકાનમાં ઘૂસી ગયા હતા અને દર્શનને દુકાનની બહાર કાઢવાના પ્રયાસો કર્યા હતા. પોતાના પર હુમલો થશે તેવી ભીતિ લાગતાં દર્શન આંબલિયા દુકાનની બહાર નહીં નીકળતા આરોપીઓએ તેને દુકાનમાં જ ઢોરમાર માર્યો હતો અને દુકાનની બહાર ઢસડી જવાનો પ્રયાસ કર્યો હતો.