દુનિયાએ PM મોદીની આતંકવાદ સામે ઝીરો ટોલરન્સની નીતિનો કર્યો સ્વીકાર
નેશનલ કાઉન્ટર ટેરરિઝમ નીતિની થશે ઝડપભેર અમલવારી સરકાર આંતકવાદ નાબૂદ કરવા લઈ રહી છે મક્કમ પગલાઓ
નવીદિલ્હી, તા. 7
કેન્દ્રીય ગૃહ પ્રધાન અમિત શાહે ગુરુવારે દિલ્હીમાં આયોજિત ’આતંક વિરોધી પરિષદ-2024’ના ઉદ્ઘાટન સમારોહને સંબોધિત કર્યો હતો. અમિત શાહે કહ્યું કે નરેન્દ્ર મોદી સરકાર દેશમાં આતંકવાદને ખતમ કરવા માટે પ્રતિબદ્ધ છે અને તેની સામે નક્કર વ્યૂહરચના સાથે આગળ વધી રહી છે. સુરક્ષા દળોએ યુવા અધિકારીઓને તાલીમ આપવી જોઈએ અને આતંકવાદનો સામનો કરવા ટેકનોલોજીનો ઉપયોગ કરવો જોઈએ. કેન્દ્રીય ગૃહમંત્રીએ કહ્યું કે આઝાદીને 75 વર્ષ વીતી ગયા છે. દેશની આંતરિક સુરક્ષા અને સરહદોની સુરક્ષા જાળવવા માટે અત્યાર સુધીમાં 36,468 પોલીસ જવાનોએ બલિદાન આપ્યું છે. આજે હું તે બધાને તેમની સર્વોચ્ચ બલિદાનની ભાવના માટે શ્રદ્ધાંજલિ આપવા માંગુ છું અને દેશ વતી તેમના પરિવારનો પણ આભાર માનું છું.
પરિષદને સંબોધતા કેન્દ્રીય ગૃહમંત્રીએ કહ્યું કે કાયદો અને વ્યવસ્થા રાજ્યનો વિષય છે, પરંતુ આતંકવાદની કોઈ પ્રાદેશિક મર્યાદા હોતી નથી, તેથી તમામ સુરક્ષા એજન્સીઓએ સંકલનમાં રહીને કામ કરવું જોઈએ. સંયુક્ત વ્યૂહરચના બનાવવી જોઈએ અને ગુપ્ત માહિતી વહેંચવી જોઈએ. અમિત શાહે કહ્યું કે નરેન્દ્ર મોદી પીએમ બન્યા બાદ દેશ આતંકવાદ સામે નક્કર વ્યૂહરચના સાથે આગળ વધી રહ્યો છે. અમે આતંકવાદને ખતમ કરવા માટે પ્રતિબદ્ધ છીએ. ગૃહમંત્રી અમિત શાહે કહ્યું કે હવે આખી દુનિયાએ પીએમ મોદીની આતંકવાદ સામે ઝીરો ટોલરન્સની નીતિનો સ્વીકાર કર્યો છે. સરકાર આતંકવાદના દુષણને ખતમ કરવા માટે પ્રતિબદ્ધ છે.
અમિત શાહે કહ્યું કે સરકારની આતંકવાદ વિરોધી તપાસ એજન્સી નેશનલ ઇન્વેસ્ટિગેશન એજન્સી તમામ આતંકવાદી કેસોમાં ઞઅઙઅનો ઉપયોગ કરે છે. પરિણામે, અત્યાર સુધીમાં નોંધાયેલા 632 કેસમાંથી 498 કેસોમાં ચાર્જશીટ દાખલ કરવામાં આવી છે અને લગભગ 95 ટકા કેસોમાં દોષિત ઠરાવવામાં આવ્યો છે. તેમણે કહ્યું કે રાજ્ય અને કેન્દ્ર સરકારના સંયુક્ત પ્રયાસોને કારણે છેલ્લા 10 વર્ષમાં જમ્મુ અને કાશ્મીર, નક્સલ પ્રભાવિત વિસ્તારો અને ઉત્તર-પૂર્વીય રાજ્યોમાં હિંસા પર ઘણી હદ સુધી નિયંત્રણ કરવામાં આવ્યું છે રાજ્યોએ પોલીસ સ્ટેશન સ્તર સુધી સંકલન સ્થાપિત કરવા અને આતંકવાદ સામે મજબૂત ઇકોસિસ્ટમ સ્થાપિત કરવા જણાવ્યું.
પોલીસ રાજ્યનો વિષય છે, તેથી રાજ્યોએ તેના માટે લડવું પડશે, પરંતુ કેન્દ્ર તેમને દરેક સંભવ મદદ કરવા તૈયાર છે. રાજ્યોમાં પોલીસ દ્વારા ટેક્નોલોજીના વધુ ઉપયોગ અને તાલીમ પર ભાર મૂકતા, તેમણે કહ્યું, જ્યાં સુધી અમે અમારી સમગ્ર દળને ટેક્નોલોજીના ઉપયોગ માટે પ્રશિક્ષિત ન કરીએ ત્યાં સુધી અમે આતંકવાદ સામે લડી શકતા નથી. હવે આપણે એ સમજીને આતંકવાદનો સામનો કરવો પડશે કે આતંકવાદી હુમલાઓ અને તેમના કાવતરાં આપણી સામે સરહદ વિનાના અને અદ્રશ્ય રીતે ઊભા છે. આપણે આપણા યુવા અધિકારીઓને ટેક્નોલોજીથી સજ્જ કરવા પડશે. ટેક્નોલોજીને તેમની તાલીમનો મહત્વનો ભાગ બનાવવો પડશે. ઘણા રાજ્યોએ તેને બનાવ્યું છે. હું તમામ રાજ્યોને પણ કહેવા માંગુ છું કે જો તમને આમાં મદદની જરૂર હોય તો હૈદરાબાદ એકેડમી પણ તમને મદદ કરી શકે છે.
આતંકવાદ અને આતંકવાદીઓને કોઈ સીમા હોતી નથી
આતંકવાદ સાથે કામ કરવાનો સંબંધ છે, રાજ્યોની પોતાની સીમાઓ હોય છે, રાજ્યોની પણ ભૌગોલિક સીમાઓ હોય છે, બંધારણીય સીમાઓ હોય છે અને આતંકવાદ અને આતંકવાદીઓને કોઈ સીમા હોતી નથી. તેઓ આંતર-રાજ્ય કાવતરાં કરે છે અને આંતરરાષ્ટ્રીય કાવતરાં પણ કરે છે, તેથી આપણે તેની સામે કેન્દ્રીય સ્તરે ચોક્કસ રણનીતિ બનાવવી પડશે. શાહે તમામ રાજ્યોના પોલીસ અધિકારીઓ પર ત્રણ નવા ફોજદારી કાયદાનો સંપૂર્ણ અમલ કરવા પર ભાર મૂક્યો હતો. તેમણે કહ્યું કે 26 નવેમ્બરે સંવિધાન દિવસ છે અને પોલીસે એવા લોકોને જામીન આપવા માટે કામ કરવું જોઈએ જેઓ લાંબા સમયથી જેલમાં છે અને જેઓ તેના હકદાર છે.
