અરજદાર યુવાનના દાદીમાને સફાઈકામદાર તરીકે શાંતિથી નોકરી કરવા દેવા માંગી હતી લાંચ રાજકોટ અઈઇના ઇન્ચાર્જ નિયામક કે.એચ.ગોહિલ સહીત ટીમનો વધુ એક સપાટો
રાજકોટ મિરર, તા.10
આ કામના ફરિયાદીના દાદી જામનગર મહાનગરપાલિકાના કાયમી સફાઈ કામદાર હોય તેની નોકરીમાં સરળતા કરી આપવા અને હેરાનગતિ નહીં કરવાના અવેજ પેટે આ કામના આક્ષેપિત નં 1 રવજી મગન પરમાર, (ઉ.વ.33, અવેજી સફાઇ કામદાર, વોર્ડ નં.9, જામનગર મહાનગરપાલિકા,વર્ગ-4)એ આ કામના આરોપી પોતાના સાહેબ એટલે કે આક્ષેપિત નંબર- (2) પ્રકાશચંદ્ર મોતીલાલ મકવાણા, (ઉ.વ.41, સેનેટરી સબ-ઇન્સ્પેકટર, વોર્ડ નં.9, જામનગર મહાનગર પાલીકા, વર્ગ-3,)એ કુલ રૂપિયા 22,500/ ની રકમ આપવા જણાવેલ છે તેમ કહી લાંચની માંગણી કરી, આજે સાંજ સુધીમાં આપી દેવા જણાવેલ.
જે લાચની રકમ આ કામના ફરિયાદી આપવા માંગતા ન હોય તેમણે જામનગર એસીબી પોલીસનો સંપર્ક કરી ફરિયાદ કરી હતી. ફરિયાદીની ફરિયાદ આધારે આજે જામનગર મહાનગરપાલીક, વોર્ડ નં.9ની ઓફીસ, ક્રિકેટ બંગલાની બાજુમાં, હોમગાર્ડ કચેરી સામે લાંચનું છટકું ગોઠવાયું હતું.
દરમિયાન રવજીએ ફરિયાદી સાથે હેતુલક્ષી વાતચીત કરી લાંચની રકમ રૂપિયા 22500/- સ્વીકારી, પોતાના હાથમાં લઈને ગણતરી કરવા લાગ્યો હતો. જે વખતે તેમને શંકા જતા ફરિયાદીને આ લાંચ ની રકમ પરત આપી દીધેલ અને ઓફિસે જઈ પોતાના સાહેબ એટલે કે આ કામના આક્ષેપિત નંબર-(2) સેનેટરી સબ ઇન્સ્પેક્ટરને આપવા જણાવ્યું હતું. જે વ્યવહાર દરમિયાન બંને લાંચ સ્વીકારતા પકડાઈ ગયા હતા. આ તકે ટ્રેપિંગ અધિકારી તરીકે જામનગર એસીબીના પીઆઈ આર.એન.વિરાણીએ રાજકોટ એસીબીના ઇન્ચાર્જ મદદનીશ નિયામક કે.એહ.ગોહિલના સુપરવિઝન હેઠળ સફળ છટકું પાર પાડ્યું હતું.
