દેશમાં ઉનાળાની ગરમી યથાવત છે અને ઘણા રાજ્યો ગરમીની લપેટમાં છે. કેટલીક જગ્યાએ તાપમાનનો પારો 43 ડિગ્રી સેલ્સિયસ સુધી પહોંચી ગયો છે. રાષ્ટ્રીય રાજધાની દિલ્હી અને ઉત્તર ભારતમાં મહત્તમ તાપમાન 40 ડિગ્રી સેલ્સિયસ નોંધાઈ રહ્યું છે, જ્યારે દક્ષિણના રાજ્યોમાં તાપમાન 42-43 ડિગ્રીએ પહોંચી ગયું છે. હવામાનશાસ્ત્રીઓના જણાવ્યા અનુસાર, રાષ્ટ્રીય રાજધાની ક્ષેત્રમાં આગામી એક કે બે દિવસ સુધી ગરમીથી રાહત મળી શકે છે કારણ કે આ દિવસે હળવા વરસાદની સંભાવના છે. તેમજ આકાશ વાદળછાયું રહી શકે છે.
દિલ્હી NCRમાં વરસાદની આગાહી
હવામાન વિભાગના જણાવ્યા અનુસાર, સોમવારથી આગામી એક કે બે દિવસ સુધી દિલ્હી એનસીઆર અને પશ્ચિમ ઉત્તર પ્રદેશમાં છૂટાછવાયા વરસાદ અને ભારે પવનની અપેક્ષા છે. હવામાન વિભાગના જણાવ્યા અનુસાર, પશ્ચિમ હિમાલય ક્ષેત્ર અને તેની આસપાસના વિસ્તારોમાં હળવા વરસાદની આગાહી છે, પરંતુ દેશના અન્ય ભાગોમાં હવામાન શુષ્ક રહી શકે છે. મંગળવારે જમ્મુ કાશ્મીર, લદ્દાખ, ગિલગિટ, બાલ્ટિસ્તાન અને મુઝફ્ફરાબાદમાં ભારે વરસાદની સંભાવના છે. જ્યારે હિમાચલ પ્રદેશમાં 18 અને 19 એપ્રિલે અને ઉત્તરાખંડમાં 19 એપ્રિલે ભારે વરસાદની આશંકા છે. આ દરમિયાન આ રાજ્યોમાં ભારે પવન પણ ફૂંકાશે. મહારાષ્ટ્રના કેટલાક વિસ્તારોમાં આગામી પાંચ દિવસ સુધી હળવો વરસાદ થવાની સંભાવના છે.
આ રાજ્યો ગરમીની લપેટમાં રહેશે
હવામાન વિભાગના જણાવ્યા અનુસાર પશ્ચિમ બંગાળ, તટીય આંધ્રપ્રદેશ અને બિહારના અલગ-અલગ વિસ્તારો હીટવેવની ઝપેટમાં છે. કાળઝાળ ગરમીને જોતા પશ્ચિમ બંગાળમાં સરકારે આ સપ્તાહે તમામ શાળાઓ અને કોલેજો બંધ રાખવાનો આદેશ આપ્યો છે. હવામાન વિભાગે પશ્ચિમ બંગાળ અને આંધ્રપ્રદેશમાં હીટ વેવ માટે ઓરેન્જ એલર્ટ જાહેર કર્યું છે. આ સાથે પંજાબ અને હરિયાણામાં પણ હીટ વેવની સ્થિતિ રહેશે. આ અંગે યલો એલર્ટ જાહેર કરવામાં આવ્યું છે. પશ્ચિમ મધ્યપ્રદેશમાં 17 અને 18 એપ્રિલે ગરમીનું મોજું આવવાની શક્યતા છે. પશ્ચિમ બંગાળના ગંગાના વિસ્તારોમાં છેલ્લા છ દિવસથી, આંધ્રપ્રદેશના દરિયાકાંઠાના વિસ્તારોમાં છેલ્લા ચાર દિવસથી અને બિહારમાં છેલ્લા બે દિવસથી ગરમીનું મોજું પ્રવર્તી રહ્યું છે.
તાપમાનમાં વધારે ફેરફાર નહીં થાય
16 એપ્રિલે દેશના ઉત્તર પશ્ચિમ વિસ્તારોમાં મહત્તમ તાપમાન 40-42 ડિગ્રી સેલ્સિયસ નોંધાયું હતું. તે જ સમયે, મધ્ય અને પૂર્વ ભારતમાં મહત્તમ તાપમાન 35-40 ડિગ્રી સેલ્સિયસ પર પહોંચી ગયું છે. પૂર્વ અને ઉત્તરપૂર્વીય રાજ્યોમાં મહત્તમ તાપમાન સામાન્ય કરતા 3-5 ડિગ્રી સેલ્સિયસ વધારે હતું. 17 એપ્રિલે દેશના ઉત્તર-પશ્ચિમ ભાગોમાં મહત્તમ તાપમાનમાં વધુ ફેરફારની અપેક્ષા નથી. પૂર્વી રાજ્યોમાં પણ તાપમાનમાં કોઈ ફેરફાર થશે નહીં, પરંતુ મધ્ય ભારતમાં આગામી બે દિવસ તાપમાનમાં 2-3 ડિગ્રી સેલ્સિયસનો વધારો થવાની સંભાવના છે.
